Daniel Kilchsperger
Ich heissä Daniel, doch dä Namä bruucht eigentlich niemert für mich. Mär seit mir eifach Dani, Däni oder au Dän. Ich bin im Sternzeichen Schütz, November1967 in Züri gebore, doch uufgwachse und iigschueled wordä bin ich in Schlieren. Wonnä tuen ich jetzt i dä schönste Gmeind vom Limmattal, in Weiningen.
Äs Musikinstrumänt begleitet mich, sitti i d Schuel gange bi. Agfange hätt's mit dämm obligatorischä Holz-speuz-chnebbäl, hütt seitmerä Blockflöte. Bevor mir dä Speichel langsam uusgange isch, han ich mich vom Blasinstrument trännt, ufes Tasteninstrument umgstellt und han agfange Orglä spillä. Nei, nöd i de Chillä, ganz gmüetlich dähei ufere Wurlitzer dänn zu därä Zyt hätt's no kei Keyboards gä.
Einigi Jahr spöter, mit 38gi (!) hätt mich minni Krankheit, mä nännt si Parkinson, däzuä bewogä äs Instrumänt z lärnä, wo für d Fingermotorik guet isch und han mich fürs Schwyzerörgeli entschiddä. A dämm hanni gstossä und zogge bises nümmä gange isch. D Chräft händ nala, han nümmä mögä. Dä Parki isch stärcher gsi. Nachärä schwärä Hirnoperation (tiefe Hirnstimulation gegen Parkinson) im Juli 2011, hanni ganz neui Ziel gha in Sache Musik, will ich durch die OP ä Läbensqualität zrugg übercho han, wie vor dä Diagnosä. Jetzt hani endlich mal wellä vor Publikum uufträttä, mich nümmä müessä verstecke mitem PARKI. Doch als Solist mitem Schwyzerörgeli hanni das nöd chönnä und au nümm wellä.
Durch en huufä Flyers wo i minärä Buebägmeind Schliere verteilt wordä sind, binni zu dä Steelband Calaloo gstossä. Also hanni vo Volksmusik uf Karibik umgstellt. Isch ja schliesslich au fast s glich, oder...? Ein einzige Schnupperabig im Probelokal hätt glanged, um mich mit däm faszinierendä Ferieninstrument uasänand z setze. Jetzt han ich das, was ich mir so immer gwünscht han, i dä Gruppe mit Stimmigsmusik s Publikum unterhaltä.
Und weisch was isch s schönste dra? Jedi Wuche wämmer eus träffed zum üebe, freu ich mich uff guet zwei Stund Ferien, woni chan abschaltä, lache und alles vergässe.
D Steelband Calaloo, die Adrässä für chli Feriestimmig, chumm au!